Қасым-Жомарт Тоқаев экономикалық өсімді қамтамасыз ету және әлеуметтік саясатты жетілдіру бойынша тапсырмалардың орындалуы туралы есепті тыңдады.
Олжас Бектеновтың хабарлауынша, биылғы жылдың қаңтар – қараша аралығында ЖІӨ 4,4% өсті. Экономиканы әртараптандыру аясында ауыл шаруашылығында (13,4%), құрылыс саласында (10,3%), саудада (8,2%), көлікте (8,1%), өңдеу өнеркәсібінде (5,3%), оның ішінде металлургияда (7,2%) және машина жасауында (6,9%), химия өнеркәсібінде (8,4%), сондай-ақ ақпарат және байланыс саласында (5,3%) тұрақты өсім байқалды.
Биылғы экономикалық өсім толығымен мұнайға жатпайтын сектордың дамуы есебінен қамтамасыз етілді (5,1%). Дегенмен, мұнай өндіру бойынша болжамды көрсеткіштердің орындалмауы экономиканың жалпы даму қарқынына әсер етті.
Мемлекет басшысы отандық өндірушілерді қолдау және терең өңдеуді ынталандыру бойынша қабылданған шаралардың нәтижесінде өңделген тауарлар экспорты 10,2%-ға өсіп, 23,3 миллиард долларды құрағаны туралы ақпарат алды. Тауарлар импорты 3,3%-ға төмендеді.
Негізгі капиталға инвестициялар көлемі 3,1%-ға артты, сонымен қатар, ең үлкен өсім де шикізаттық емес салаларда байқалды.
Президентке өңірлерде өмір сүру сапасын жақсарту бойынша жұмысты күшейту және кәсіпкерлік белсенділікті одан әрі арттыру жоспарлары таныстырылды.
"Қорытындысында Қасым-Жомарт Тоқаев өңдеу өнеркәсібінде, ауыл шаруашылығында, құрылыс пен көлік саласында оң динамиканы арттыру бойынша жұмысты жалғастыруды тапсырды. Инвестиция тарту, әлеуметтік және инженерлік инфрақұрылымды модернизациялау, импортты алмастыру және әлеуметтік маңызды азық-түлік өнімдеріне бағаның тұрақтылығын бақылау бойынша бірқатар тапсырмалар берілді", – делінген Ақорда сайтында жарияланған хабарламада.
Бұған дейін Қасым-Жомарт Тоқаевтың баспасөз қызметі Қазақстан Президентіне Тәуелсіздік күніне орай келіп түсетін құттықтау телеграммалары туралы хабарлаған болатын.