Биология профессоры Дос Сарбасов 2 желтоқсанда ракқа қарсы препараттың әзірленуі туралы ақпарат берді, деп хабарлайды үкіметтің баспасөз қызметі.
«Біз DVC ракқа қарсы препаратын әзірлеу жұмысын жалғастырып жатырмыз, — деді дәрінің әзірлеушісі, — рұқсат құжаттарын алдық, препаратты Қазақстанда шығардық, сондай-ақ клиникалық сынақтардың бірінші және екінші кезеңдерін өткіздік». Сынақтар Қазақ онкология және радиология ғылыми-зерттеу институтында жүргізілуде.
Сарбасовтың айтуынша, алғашқы кезеңде «препараттың кішкентай дозасы — 0,3 грамм» қолданылды, қазір дәрігерлер 0,6 граммдық қосарланған дозаны арсен триоксидімен біріктіріп қолдануда. «Бұл әзірлеме — мақсатты химиотерапия. Біз глюкозаны белсенді түрде сіңіретін рак клеткелерін жоямыз, — деп түсіндірді Дос Сарбасов және қосты: — Егер бұл нәтиже берсе, жаһандық әсері зор болады».
Бұған дейін жоғары білім және ғылым министрі Саясат Нурбек DVC препараты клетканың қоректену циклін бұзатынын, бұл арсеннің көмегімен клетканың жойылуына әкелетінін түсіндірген болатын.
Зерттеуге қатысатын 15 науқастың барлығында тұрақтану байқалды, яғни препарат қабылдау кезінде ісік өспеді. «Бір науқастың ісігі 30%-ға кішірейді. Бұл деректерді алған кезде біз өте қуаныштымыз, бірақ бұл тек бастапқы әсер, — деді зерттеуші. — Бұл препараттың жұмыс істейтінін көрсетуі мүмкін, бірақ істі соңына дейін жеткізуіміз керек».
Препаратқа патент — халықаралық, деп қосты Сарбасов, «ол Америка мен Еуропаны қамтиды».
Биотехнолог Дос Сарбасов 27 жыл АҚШ-та жұмыс істеп, клеткалардың өсуі мен көбеюінде ерекше ақуыздың (MTOR) рөлін ашушылардың бірі ретінде танымал болды. Содан кейін ғалым Білім және ғылым министрлігінің шақыруымен Қазақстанға оралды, қазір ол ҚР Ұлттық ғылым академиясының вице-президенті, Назарбаев Университетінің (NU) биология профессоры.